Analysis of Donald Caird's Come Again

Donald Caird's
come again!
Donald Caird's come again!
Tell the news in brugh and glen,
Donald Caird's come again!

Donald Caird can lilt and sing,
Blithely dance the Hieland fling,
Drink till the gudeman be blind,
Fleech till the gudewife be kind;
Hoop a leglin, clout a pan,
Or crack a pow wi' ony man;
Tell the news in brugh and glen,
Donald Caird's come again.

Donald Caird's come again!
Donald Caird's come again!
Tell the news in brugh and glen,
Donald Caird's come again!

Donald Caird can wire a maukin,
Kens the wiles o' dun-deer staukin',
Leisters kipper, makes a shift
To shoot a muir-fowl in the drift;
Water-bailiffs, rangers, keepers,
He can wauk when they are sleepers;
Not for bountith or reward
Dare ye mell wi' Donald Caird.

Donald Caird's come again!
Donald Caird's come again!
Gar the bagpipes hum amain,
Donald Caird's come again!

Donald Caird can drink a gill
Fast as hostler wife can fill;
Ilka ane that sells gude liquor
Kens how Donald bends a bicker;
When he's fou he's stout and saucy,
Keeps the cantle o' the cawsey;
Hieland chief and Lawland laird
Maun gie room to Donald Caird!

Donald Caird's come again!
Donald Caird's come again!
Tell the news in brugh and glen,
Donald Caird's come again!

Sleek the amrie, lock the kist,
Else some gear may weel be mist;
Donald Caird finds orra things
Where Allan Gregor fand the tings;
Dunts of Kebbuck, taits o' woo,
Whiles a hen and whiles a sow,
Webs or duds frae hedge or yard-
'Ware the wuddie, Donald Caird!

Donald Caird's come again!
Donald Caird's come again!
Dinna let the Shirra ken,
Donald Caird's come again!

On Donald Caird the doom was stern,
Craig to tether, legs to airn;
But Donald Caird wi' mickle study,
Caught the gift to cheat the wuddie;
Rings of airn, and bolts of steel,
Fell like ice frae hand and heel!
Watch the sheep in fauld and glen,
Donald Caird's come again!

Donald Caird's come again!
Donald Caird's come again!
Dinna let the Justice ken,
Donald Caird's come again!